ازاي نختار عضو مجلس الشعب اللي هيعمل الدستور هام جداً

من طرف **فطيم** الأحد أبريل 10, 2011 3:40 pm

• بعد الانتهاء من التعديلات الدستورية شغلنا نفسنا بحاجات كتير!!!!
- مين اللي قتل السادات ؟
- هو فين مبارك ؟ وهل توقف مبارك عن صبغ شعره ؟
- هو إيه اللي حصل في ماتش الزمالك ؟ وهو مين الراجل أبو جلابية؟
- مين يصلح لرئاسة الجمهورية ؟
بس نسينا نسأل أهم سؤال كيف نختار عضو مجلس الشعب ؟ وهو ده اللي لازم نركز عليه بس قبل ما نختار عضو مجلس الشعب لازم أعرف إيه هو مجلس الشعب ؟؟؟؟؟؟

مجلس الشعب
• هو اللي هيعمل الدستور الجديد. يعني إحنا عايزين مجلس شعب يحقق مصلحة الشعب كله. ويقوم بدوره على أكمل وجه.. ونتأكد أن عضو مجلس الشعب عايز مصلحتنا إحنا.. مش مصلحته هو.
• هو اللي بيحط سياسة مصر في الاقتصاد والتعليم والصحة والاتفاقات الدولية وميزانية الدولة.
• هو اللي بيراقب على الحكومة والوزراء ويحقق نعاهم ويستوجبهم, ويفصلهم لو حصل تقصير أو إهمال.
1- يعني عضو مجلس الشعب مش مهمته انه يشغل ابنك.. ده مهمته أنه
يحط خطه كامله للقضاء على البطالة.
2- يعني عضو مجلس الشعب مش مهمته يرصف طريق بلدكم.. ده مهمته أنه يحط خطه لتطوير المرور في مصر كله.
3- يعني عضو مجلس الشعب مش فليدته انه واسطة ليك.. ده المفروض انه يجيب حقوقك وحقوق شعب مصر كله.
4- يعني عضو مجلس الشعب مش فايدته انه يعالجك على نفقة الدولة.. ده المفروض انه هيعتمد خطه كاملة للخدمات الصحية والعلاج الشامل المجاني يحفظ للكل كرامته.. للفقير قبل الغني.
5- يعني عضو مجلس الشعب هو اللي يقدر يقول لا لتوريث أبناء المستشارين لأنهم أولى من غيرهم لأنهم نشئوا في بيئة دارسة للقانون ولو كانوا حاصلين على تقدير مقبول.
6- مش عايزين مجلس شعب من الحزب الوطني.. اللي سرقوا الشعب وكذبوا عليه وحققوا مصالحهم الشخصية فقط.

..... الصدقة لله وليس من أجل الوصول لمجلس الشعب ...

أزاي نختار عضو مجلس الشعب ؟
• لازم نختار عضو مجلس شعب يؤدي مهامه على أكمل وجه.. يراقب
الحكومة.. ويصدر قوانين وتشريعات تخدمنا.
• مش لازم اللي نختاره يكون ابن البلد.. نختار أي حد فاهم وواعي وهيخدم البلد.
• مش عايزين واحد مرتشي أو همه على الفلوس.. الناس دي هتجري وراء مصلحتها الشخصية وبس.
• مش عايزين واحد محتاج السلطة علشان يحمي بها فلوسه. نختار النزيه والشريف اللي نأتمنه على حقوقنا.
• نخلي بالنا من المنافقين والوصوليين.. دول ممكن يعملوا صفقات مع النظام عشان يحافظ على مركزه ومصلحته الشخصية. ويضيع حقوق الشعب.
• نحترس من الجاهل.. اللي مش فاهم في الأرقام ولا يعرف في لغة القانون.. واحد زيه هيناقش ميزانية الدولة ازاي ؟؟ ولا هيعتمد قوانين ازاي وتفيد الشعب ازاي ؟؟
• نختار واحد مثقف وواعي وفاهم.ز ويحاسب الحكومة على كل مليم بتصرفه وكله قرار بتنفذه.
• لو اخترت واحد على أساس وجبة أو 50 جنيه أو وعد بوظيفه. اعرف انك بتشاركه في الجريمة, وهيكون السبب في ضياع حقوق الناس وإهدار المليارات في مصر.
..................................................................................................
وفي الآخر.. لازم نختار عضو شعب يقدر فعلاً يعمل دستور يحمي الشعب مش يحمي النظام... دستور السلطة والرقابة فيه تكون للشعب.. دستور لا يصنع ديكتاتور.. دستور لا يصنع وزراء لصوص.. دستور يحفظ كرامتنا.. دستور يحترم آدميتنا وحقوقنا وحقوق ولادنا.. دستور يعبر عن الشعب كله.. دستور يحافظ على ثورتنا العظيمة

القسم بالله العظيم

أقسم بالله العظيم أن أختار من يمثلني في مجلس الشعب وأحسن الاختيار.. وأن يكون قادر على أداء دوره الرقابي والتشريعي, ويعبر عن الشهب في اختيار الدستور الجديد بغض النظر عن ابن البلد أو من عائلتي.. وأن لا أعطي صوتي لجاهل أو منافق أو لص أو مرتشي أو صاحب مصلحة أو طالب سلطة أو امن عرض عليه رشوة مادية أو عينية أو قدم لي خدمة في يوم من الأيام..

والله على ما أقول شهيد

ازاي نختار عضو مجلس الشعب اللي هيعمل الدستور هام جداً 943230